Miss H's Blog: 第一次捐助

Monday, January 25, 2010

第一次捐助

琴日終於奉獻左我人生第一次, 就係捐助物品俾有需要既人. 之前果晚, 執左好多出黎,
全部都係d vcd, 公仔, 玩具, 大部份仲要係未開既. 都唔知果陣買黎做乜, 又唔捨得掉,
一直放係度. 因為掉左佢又唔捨得, 早排係度諗, 不如捐俾人啦. 於是執好哂,
就用liz lisa個行李箱加多一個袋啦. 都幾重架!!!

打算琴日早上拎去, 諗住少人d啦條街, 點知, 一訓訓到下晝1點半. 唉... 有d想唔出街,
但係兩舊野放係個廳度, 一定又俾人鬧啦, 阻地方丫嘛, 於是晏少少出左去啦.
一個喼加一袋野, 出到街好似走難咁不過, 好多途人, 見到人地咁多野, 都唔會讓一讓,
仲要幾個人排排拍咁樣係個行人路度行, 我都唔知點避佢地好. 唉!

終於黎到保良局喇. 就係我返南華下面果度, 下次就唔洗專登黎啦,
遲下我返返去既話就可以順便帶黎, 唔洗兩頭行.

去到大門口閂左閘, 要行上側門上. 因為要行上鈄路, 拉住咁重真係有d吃力.

見到側門就行入去了. 第一次去, 真係有d驚, 呵呵. 好驚有人問我, "小姐你黎做乜"
不過冇啦, 我行到上去, 見到果度個大門係閂左. 兩邊遊樂場都有小朋友係度玩.
心想, 呢d就係住係度既小朋友喇. 見到側面有個看更亭, 我記得我打去問果個主任果陣,
佢係叫我交低俾出面d保安, 佢地會轉交俾佢地. 咁我就問佢啦,
呢個保安都估唔到我帶左咁多野黎, 因為我就咁放入行李箱, 入面冇袋啦,
保安就要搵d袋黎入住佢, 下次我會用袋入左先lu~ 我同個保安一齊將d野放入d袋度,
一路聽到有小朋友玩既笑聲. 再望下另一邊, d小朋友玩得好靜. 心入面又係度諗,
我諗我呢d野應該可以幫助到呢班小朋友呱. 到執完果陣, 我問保安,
呢d野係咪真係會俾到呢d小朋友, 佢話係, 我話因為見出面好多團體話就話收舊物,
但係好多都拎去轉賣, 就唔係我心中既意願了, 我係想有需要既人可以唔洗$$得到,
唔係再要用$$去買囉. 保安同我講可以放心, 佢地係會俾小朋友既,
但係都會有專人篩選過先會交俾d小朋友玩. 呼~ 咁都好d....

走果陣保安同我講左句多謝, 覺得有少少奇怪. 我係冇諗到幫人會聽到句多謝. 哈哈~

我回應一句, "唔洗~" 因為果d都係我唔要既野之嘛. 洗乜多謝喎! 不過到走果陣有d唔捨得.
因為果d野陪左我咁多年, 一下子冇哂. 不過總好過就咁掉左佢, 咁咪仲唔捨得!
反過來看, 而家捐左呢d野出黎, 又可以幫到人, 小朋友可能收到會好開心喎!
而且間房又少咁d野, 幾好丫!! 我一路會再執間房, 果d十年都唔郁既野, 舊既就掉,
新淨d既會再拎去保良局!!