Miss H's Blog: 再見了, 紅磡天星小輪 (Part 1)

Friday, April 1, 2011

再見了, 紅磡天星小輪 (Part 1)

今日就係天星小輪紅磡線最後營運既一日, 對於經常乘搭既我, 非常之唔捨得.
其實紅磡碼頭有除左天星小輪2條航線, 另一條就係北角到紅磡, 由新渡輪經營.
由於而家公司同以前間公司都係紅磡. 所以呢8-9年期間返工放工我都係搭船.
雖然我主要係搭新渡輪果邊, 但天星小輪果邊都經常搭. 所以對我黎講有一定既影響.
同埋真係超級唔捨得!!!!!

回想起呢幾年間, 放工就係搭呢條線過灣仔做GYM,
成日放工搭過去灣仔再行去銅鑼灣"冷"街. 每年夏天7月份,
日日都專登搭呢班船去睇日落. 因為搭到6:55pm班船的話,
一定會睇到好靚既日落, 早一班遲一都睇唔到. 咁當然唔會每一日都有靚既日落啦.
但多數都會有. 到聖誕節, 船一路開, 一路望去尖沙咀有燈飾睇.
好多好多數之不盡既回憶. 如今已變成歷史. 點解會咁. 唉!!!!!

本身好唔鐘意搭巴士, 一黎我好易暈車浪, 二黎我好怕人多, D人迫住坐,

人多又一陣氣味好難頂. 加上巴士班次唔準, 搭船就好好多了, 班次準, 又有風景睇,
坐得舒舒服服. 一陣陣海風吹埋黎好正!!!! 早幾日先搭過黎, 今日再搭已經係最後一日,
真係好不捨.

搭左咁多年, 今晚最後一日點都要坐最後一次. 未行到去, 已經見到遠處有好多人,
好多人係度影相, 又有人點著蠟燭集會.

其實有冇辦法可以挽回返呢條航線?

返緊工果陣我就係度諗, 琴日有人跳海表達意見. 應該會有人收集市民既簽名.
如果有的話, 我都會簽. 點知見到真係有呢. 我埋左去簽名. 唔知係咪民建聯既人?
有個叔叔見到我好似想埋去簽, 佢就笑住咁叫我簽名支持保留航線, 我就簽了,
簽完之後佢仲好友善咁對我微笑講多謝. 點知原來隔離果個人係謝偉俊啊~
點解成日去到邊都見到佢?

從未見過好似今日咁擠擁既情況. 今日好多人影相留念. 亦都好多人專登去搭班船,
由於真係太多人, 秩序都幾混亂. 好多人掛住影相都唔行, 令到船既班次亂哂. 延遲到達.
本來灣仔船先到, 5分鐘後到中環船到. 搞到2邊船一次過到, 2邊船既人一次過落船,
搞到碼頭逾千人次. 我都行唔到了, 我企埋一邊, 等D人散咁D先可以行入去.